GALIT NA GALIT pa rin hanggang ngayon pala si Marian Rivera sa Channel 2 partikular na sa programang TV Patrol, kung saan ang feeling ng aktres ay sinadyang palabasin siyang “bobita” matapos na magsalita siya noon ng: “I am a psychology!”
Ito ang napag-alaman ng Pinoy Parazzi matapos na namin siyang tangkaing kausapin sa product endorsement ng Panasonic na ginawa sa Edsa Shangri-La.
Ayon sa aming source, nang malaman umano ni Marian na may naghihintay sa kanyang TV crew ng Dos, agad itong tumalilis ng alis matapos ang kanyang pagsasalita sa stage. “Galit pa rin siya hanggang ngayon, kaya sorry na lang po sa mga taga-GMA at TV5 dahil nadamay kayo,” pahayag ng isang taong malapit sa aktres.
Sa kabilang banda, bukod sa personal niyang “galit” ay posibleng iniiwasan pa rin ni Marian na pag-usapan ang isyung isa siyang dalagang ina. Dahil hanggang ngayon, tuluy-tuloy na pinag-uusapan ang pagkakaroon niya ng anak sa pagkadalaga.
Noong gabing iyon, nakita rin namin sa Shangri-La si Dingdong Dantes (na hindi kasama ni Marian). Tinangka naming kausapin si Dingdong, pero tumangging magbigay-komento ang binata.
